Sterre blink by Skouterrein

Inlynskaatshokkie
Brian Munango
  • 2 Days Ago 20 June 2025
Inlynskaatshokkie is môreaand in die kollig wanneer twee uitsoekspanne van nasionale gehalte mekaar in die SPAR All Star-wedstryd takel.

Die opwindende wedstryd begin om 19:30 by die Badgers Inline Hokkieklub op die Windhoek Skouterrein en sal die aandag op die land se voorste manspelers in die ope afdeling vestig.

Die uitsoekspanne is saamgestel uit uitmuntende spelers van verskeie klubs. Die spanne is oordeelkundig gekies deur die nasionale spankaptein Christiaan Coetzee en sy adjunk Anko Lucks – twee van die plaaslike sport se mees ervare figure.

Die nasionale manspan berei voor om in Augustus in 'n toernooi in China te gaan meeding.

Coetzee sê: “Die vlak van kompetisie in die ope afdeling is ongelooflik hoog en dit was ’n groot uitdaging om die spanne saam te stel. Ons doel was om uitnemendheid te vier en aan ondersteuners te wys hoe ver die sport oor die jare gevorder het.”

Die All Star-wedstryd is ’n vertoonvenster en huldeblyk aan die vaardigheid, toewyding en sportiewe gees van Namibië se inlynskaatshokkie-gemeenskap.

Met die mengsel van ervare sterre en opkomende jong talent op dieselfde baan, kan aanhangers ’n vinnige en vermaaklike wedstryd verwag, gedryf deur respek en trots.

Benewens die aksie op die baan, plaas die byeenkoms ook die klem op die positiewe invloed van plaaslike klubs, wat ’n sleutelrol in die ontwikkeling van jong talent en die bevordering van deelname aan die sport speel. Organiseerders hoop dat die skouspel ’n nuwe generasie spelers sal inspireer en die sport se profiel landwyd verder sal verhoog.

Toegang is gratis en toeskouers word aangemoedig om in groot getalle op te daag om hierdie opwindende hoogtepunt te ondersteun. Die SPAR All Star-wedstryd beloof om ’n onvergeetlike viering van passie en sporttalent te wees.