Medaljes in SA wys boogskutters ken hul storie

Boogskiet
Die span uit Namibië was by 'n kompetisie van ware internasionale gehalte in aksie en het hul vernuf uitgestal.
Andrew Poolman
  • 11 Hours Ago

Die 76ste Suid-Afrikaanse nasionale buitelug-kampioenskap in teikenboogskiet is vanaf Vrydag tot Sondag in Johannesburg aangebied.

'n Totaal van 154 boogskutters het ingeskryf, met gedugte skutters van oraloor Suid-Afrika asook verteenwoordigers wat van Namibië, Kenia, Zimbabwe, Mauritius en selfs Italië ingevlieg vir ‘n kompetisie van ware internasionale gehalte.

Namibië het 'n span van nege boogskutters oor verskeie ouderdomsgroepe en boogklasse gestuur, wat beide saamgestelde boogskutters en 'n kaalboogspesialis ingesluit het.

Met die saamgestelde boog was een van Namibië se para-boogskutters, Jan-Lotz du Toit, ook in aksie – vasbeslote om sy persoonlike rekords te verbeter.

Vorige medaljewenners by die SA nasionale kampioenskap soos Jannie Meuwesen, Babette Taljaard, Ilana Malan, Jacqueline Coetzee en Lutz Wahlers was terug met die doel om hul vorige podiumplekke te herhaal, of op te gradeer.

Die pa-en-seun Louan en AJ Groenewald het inderdaad drie generasies verteenwoordig, in die voetspore van AJ se oupa (ook AJ), wat in die vroeë 1970's aan SA nasionale kampioenskappe deelgeneem het. Dis nou ‘n nalatenskap!

Die debutant Bianca Karsten was ook ingestel om haar eerste SA nasionale medalje in te oes.

Nadat die Boogskietvereniging van Namibië (AAN) se span in 2025 ses medaljes vanaf die SA nasionale kampioenskap huis toe gebring het, was die hoop om vanjaar 'n groter medaljetelling te behaal.

Die 720-kwalifikasieronde het Vrydag plaasgevind, ná booginspeksie en oefenrondtes.

Sodra die ranglys vasgestel is, is dit tyd vir die uitskakelingsfase waar boogskutters pyl vir pyl sake uitspook totdat net een oorbly.

Saterdag sou bestaan uit uitskakelrondtes asook alle bronsmedaljewedstryde, insluitend span- en gemengde span-items. Op Sondag sou die goue- en silwermedaljewedstryde deur die prysuitdeling gevolg word.

Die openingsdag van die kompetisie het 'n energieke atmosfeer gehad, met sonskyn wat uiteindelik deurgebreek het ná 'n paar dae van swaar reën. Toestande by die Markspark-sportterrein was ideaal – droog, windstil en perfek geskik vir hoëvlakprestasie.

Al die Namibiese boogskutters het sterk kwalifikasie-uitslae en belowende ranglyspunte behaal en hulself goed geposisioneer vir medaljegeleenthede oor die volgende twee dae.

 

Uitslae

'n Uitstaande prestasie was Louan Groenewald (mans 50-plus saamgestelde boog) se nuwe Namibiese nasionale rekord met 'n uitsonderlike telling van 696 uit 720. Die Boogskietvereniging van Namibië is trots op dié prestasie en wys uit dat dit werklik merkwaardig is om so 'n uitslag by 'n wêreldklas-geleentheid te behaal.

Teen die einde van dag drie het Namibiërs die volgende podiumposisies behaal:

Lutz Wahlers – Mans “recurve barebow” | Silwer.

Jannie Meuwesen – Mans saamgestelde boog | Silwer.

Jacqueline Coetzee – Vroue saamgestelde boog | Silwer.

Ilana Malan – Vroue 50+ saamgestelde boog | Silwer.

Bianca Karsten – Vroue 50+ saamgestelde boog | Brons.

Saamgestelde boog, gemengde span 50+ (Louan Groenewald en Ilana Malan) | Silwer.

Saamgestelde boog, gemengde span (Jannie Meuwesen en Jacqueline Coetzee) | Silwer.

 

Streekkampioenskap

Die kompetisie het ook as die Suider-Afrikaanse streekkampioenskap gedien. Om vir medaljes te kwalifiseer, moet elke kategorie inskrywings van ten minste twee lande insluit en amptelik deur Wêreldboogskiet (WA) erken en geakkrediteer wees.

Namibië het die volgende uitslae by die Suider-Afrikaanse streekkampioenskap behaal, wat deur Wêreldboogskiet Afrika toegeken word:

Lutz Wahlers – Mans “recurve barebow” | Silwer.

Jannie Meuwesen – Mans saamgestelde boog | Silwer.

Jacqueline Coetzee – Vroue saamgestelde boog | Silwer.

Ilana Malan – Vroue 50+ saamgestelde boog | Silwer.

Bianca Karsten – Vroue 50+ saamgestelde boog | Brons.

Gemengde span saamgestelde boog (Jannie Meuwesen en Jacqueline Coetzee) | Silwer.

Die Namibiese span het met geweldige trots en 'n welverdiende versameling medaljes huis toe gekom, wat hul toewyding, dissipline en uitsonderlike prestasie dwarsdeur die geleentheid weerspieël.

Agter elke span op die kompetisielyn is ook 'n span. Die beamptes wat die boogskutters in Johannesburg vergesel het, was Anke Albat as fisioterapeut, Heidi Meuwesen as media- en skakelbeampte, Engela du Toit as agent vir paraboogskiet en J. du Toit senior as bestuurder vir paraboogskiet.